ਵੱਡੀ ਖ਼ਬਰ: ਬਠਿੰਡਾ ਫ਼ੌਜੀ ਯੂਨਿਟ ਦੇ ਤਿੰਨ ਫ਼ੌਜੀ ਜਵਾਨ ਭਿਆਨਕ ਸੜਕ ਹਾਦਸੇ ’ਚ ਜਿਊਂਦੇ ਸੜ ਗਏ, 5 ਦੀ ਹਾਲਤ ਗੰਭੀਰ

ਸ੍ਰੀਗੰਗਾਨਗਰ : ਅੱਜ ਵੀਰਵਾਰ ਵਾਪਰੇ ਇੱਕ ਭਿਆਨਕ ਸੜਕ ਹਾਦਸੇ ’ਚ ਤਿੰਨ ਫ਼ੌਜੀ ਜਵਾਨ ਜਿਊਂਦੇ ਸੜ ਗਏ। ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਜ਼ਿਲ੍ਹੇ ’ਚ ਰਜ਼ੀਆਸਰ-ਛਤਰਗੜ੍ਹ ਸੜਕ ਉੱਤੇ ਇੱਕ ਜਿਪਸੀ ਵੈਨ ਪਲਟ ਗਈ ਤੇ ਇਸੇ ਦੌਰਾਨ ਉਸ ਵਿੱਚ ਅੱਗ ਲੱਗ ਗਈ। ਇਸ ਹਾਦਸੇ ’ਚ ਪੰਜ ਵਿਅਕਤੀ ਜ਼ਖ਼ਮੀ ਵੀ ਹੋਏ ਹਨ।

ਜਾਣਕਾਰੀ ਮੁਤਾਬਕ ਬਠਿੰਡਾ ਸਥਿਤ ਫ਼ੌਜੀ ਯੂਨਿਟ ਦੇ 8 ਫ਼ੌਜੀ ਜਵਾਨ ਸੂਰਤਗੜ੍ਹ ਤੋਂ ਜਿਪਸੀ ’ਚ ਰਵਾਨਾ ਹੋਏ ਸਨ । ਮੌਕੇ ਤੋਂ ਬੁਰੀ ਤਰ੍ਹਾਂ ਸੜੀ ਹੋਈ ਹਾਲਤ ਵਿੱਚ ਤਿੰਨ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ। ਜ਼ਖ਼ਮੀਆਂ ਨੂੰ ਸੂਰਤਗੜ੍ਹ ਦੇ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ ਹੈ।

Advertisements

ਰਜ਼ੀਆਸਰ ਪੁਲਿਸ ਥਾਣੇ ਦੇ ਇੰਚਾਰਜ ਵਿਕਰਮ ਤਿਵਾੜੀ ਨੇ ਦੱਸਿਆ ਕਿ ਇਹ ਹਾਦਸਾ ਰਜ਼ੀਆਸਰ–ਛਤਰਗੜ੍ਹ ਸੜਕ ਉੱਤੇ ਇੰਦਰਾ ਗਾਂਧੀ ਨਹਿਰ ਦੀ ਬੁਰਜੀ ਨੰਬਰ 330 ਨੇੜੇ ਵਾਪਰਿਆ। ਵਾਹਨ ਅਚਾਨਕ ਬੇਕਾਬੂ ਹੋ ਕੇ ਪਲਟ ਗਿਆ ਤੇ ਸੜਕ ਕੰਢੇ ਲੱਗੇ ਇੱਕ ਰੁੱਖ ਨਾਲ ਜਾ ਟਕਰਾਇਆ। ਉੱਥੇ ਜਿਪਸੀ ਨੂੰ ਅੱਗ ਲੱਗ ਗਈ ਤੇ ਉੱਥੇ ਮੌਜੂਦ ਝਾੜੀਆਂ ਨੇ ਵੀ ਤੁਰੰਤ ਅੱਗ ਫੜ ਲਈ। ਫ਼ੌਜੀ ਜਵਾਨਾਂ ਨੂੰ ਬਾਹਰ ਨਿੱਕਲਣ ਦਾ ਕੋਈ ਮੌਕਾ ਨਾ ਮਿਲ ਸਕਿਆ।

Advertisements

ਅੱਗ ਦੀਆਂ ਉੱਚੀਆਂ ਲਾਟਾਂ ਵੇਖ ਕੇ ਲੋਕ ਘਟਨਾ ਸਥਾਨ ਉੱਤੇ ਪੁੱਜੇ ਤੇ ਪੰਜ ਜਵਾਨਾਂ ਨੂੰ ਬਚਾ ਲਿਆ ਪਰ ਤਿੰਨ ਜਵਾਨ ਤਦ ਤੱਕ ਬੁਰੀ ਤਰ੍ਹਾਂ ਅੱਗ ਦੀ ਲਪੇਟ ’ਚ ਆ ਚੁੱਕੇ ਸਨ। ਮ੍ਰਿਤਕਾਂ ਦੀ ਸ਼ਨਾਖ਼ਤ ਸੂਬੇਦਾਰ ਏ. ਮਾਮਜਰ, ਦੋ ਹੌਲਦਾਰਾਂ ਦੇਵ ਕੁਮਾਰ ਤੇ ਐੱਸਕੇ ਸ਼ੁਕਲਾ ਵਜੋਂ ਹੋਈ ਹੈ।

Advertisements

35 ਸਾਲਾ ਐੱਸਕੇ ਪਰਜਾਪਤੀ, 34 ਸਾਲਾ ਅੰਕਿਤ ਵਾਜਪੇਈ, 27 ਸਾਲਾ ਉਮੇਸ਼ ਯਾਦਵ, 28 ਸਾਲਾ ਅਸ਼ੋਕ ਓਝਾ ਤੇ 27 ਸਾਲਾ ਭੰਵਰ ਲਾਲ ਬਬਲੂ ਜ਼ਖ਼ਮੀ ਹਨ। ਇਨ੍ਹਾਂ ਵਿੱਚੋਂ ਤਿੰਨ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।