ਘਰ ਦੀ ਛੱਤ ਡਿੱਗਣ ਕਾਰਨ ਪਰਿਵਾਰ ਦੇ 4 ਜੀਆਂ ਦੀ ਮੌਤ,3 ਜਖਮੀ

ਜਲੰਧਰ – (ਸੰਦੀਪ ਸਿੰਘ ਵਿਰਦੀ/ ਗੁਰਪ੍ਰੀਤ ਸਿੰਘ) –ਸੁਨਾਮ ਦੇ ਇੰਦਰਾ ਬਸਤੀ ਵਿਖੇ ਸਟੇਡੀਅਮ ਨੇੜੇ ਇਕ ਮਜਦੂਰ ਪਰਿਵਾਰ ਦੇ ਘਰ ਦੀ ਛੱਤ ਡਿੱਗਣ ਕਾਰਨ ਪਤੀ ਪਤਨੀ ਸਮੇਤ ਦੋ ਬੱਚਿਆਂ ਦੀ ਮੌਤ ਅਤੇ ਪਰਿਵਾਰ ਦੇ ਤਿੰਨ ਜੀਆਂ ਦੇ ਜਖਮੀ ਹੋਣ ਦੀ ਦੁਖਦਾਈ ਖਬਰ ਹੈ।ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਸੁਨਾਮ ਰੇਲਵੇ ਸਟੇਸ਼ਨ ਦੇ ਸਾਹਮਣੇ ਇੰਦਰਾ ਬਸਤੀ ‘ਚ ਬਲਵੀਰ ਕੁਮਾਰ ਨਾਂਅ ਦਾ ਇਕ ਮਜਦੂਰ ਆਪਣੇ ਪਰਿਵਾਰ ਸਮੇਤ ਇੱਕੋ ਕਮਰੇ ਦੇ ਮਕਾਨ ਵਿਚ ਰਹਿ ਰਿਹਾ ਸੀ ਅਤੇ ਗਰੀਬੀ ਕਾਰਨ ਇੰਨ੍ਹੀ ਠੰਢ ਦੇ ਬਾਵਜੂਦ ਵੀ ਉਹ ਆਪ ਤਾਂ ਆਪਣੀ ਪਤਨੀ ਅਤੇ ਸਾਹੁਰਿਆਂ ਤੋਂ ਆਕੇ ਉਸ ਕੋਲ ਰਹਿ ਰਹੀ ਪੁੱਤਰੀ ਸਮੇਤ ਮਕਾਨ ਦੀ ਛੱਤ ਉੱਤੇ ਬਣਾਏ ਇਕ ਆਰਜੀ ਜਿਹੇ ਤੰਬੂ ‘ਚ ਹੀ ਸੁੱਤਾ ਪਿਆ ਸੀ ਜਦੋਂ ਕਿ ਉਸਦਾ ਪੁੱਤਰ ਅਤੇ ਨੂੰਹ ਦੋ ਬੱਚਿਆਂ ਸਮੇਤ ਹੇਠ ਕਮਰੇ ‘ਚ ਪਏ ਸਨ।

ਬੀਤੀ ਰਾਤ ਕਰੀਬ ਪੌਣੇ ਕੁ ਬਾਰਾਂ ਵਜੇ ਘਰ ਦੀ ਛੱਤ ਪੁਰਾਣੀ ਅਤੇ ਪਏ ਮੀਂਹ ਦਾ ਪਾਣੀ ਰਚਣ ਕਾਰਨ ਅਚਾਨਕ ਡਿੱਗ ਪਈ।ਜਿਸ ਕਾਰਨ ਕਮਰੇ ‘ਚ ਸੁੱਤੇ ਪਏ ਦੀਪਕ ਕੁਮਾਰ,ਉਸਦੀ ਪਤਨੀ ਅਤੇ ਉਨ੍ਹਾਂ ਦੇ ਦੋ ਬੱਚੇ ਮਕਾਨ ਦੇ ਮਲਬੇ ਹੇਠ ਦੱਬ ਗਏ।ਪਤਾ ਲੱਗਣ ਤੇ ਪੁਲਿਸ ਚੌਂਕੀ ਨਵੀਂ ਅਨਾਜ ਮੰਡੀ ਦੇ ਇੰਚਾਰਜ ਸਬ ਇੰਸਪੈਕਟਰ ਕਰਮ ਸਿੰਘ ਸਮੇਤ ਪੁਲਿਸ ਪਾਰਟੀ ਤੁਰੰਤ ਮੌਕੇ ਤੇ ਪਹੁੰਚ ਗਏ ਅਤੇ ਇਕੱਠੇ ਹੋਏ ਲੋਕਾਂ ਦੀ ਮੱਦਦ ਨਾਲ ਮਲਬੇ ਹੇਠ ਦਬੇ ਹੋਏ ਘਰ ਦੇ ਜੀਆਂ ਨੂੰ ਬਾਹਰ ਕੱਢਿਆ ਗਿਆ।ਘਰ ਦੇ ਮਲਬੇ ‘ਚੋਂ ਕੱਢੇ ਗਏ ਦੀਪਕ ਕੁਮਾਰ (32) ਪੁੱਤਰ ਬਲਵੀਰ ਕੁਮਾਰ,ਜਾਨਵੀ (28) ਪਤਨੀ ਦੀਪਕ ਕੁਮਾਰ,ਸਮੇਤ ਦੋ ਬੱਚੇ ਬਵੀ (10) ਅਤੇ ਨਵੀ (8) ਪੁੱਤਰ ਦੀਪਕ ਕੁਮਾਰ ਨੂੰ ਤੁਰੰਤ ਇਲਾਜ ਲਈ ਸਿਵਲ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਵੱਲੋਂ ਇੰਨ੍ਹਾਂ ਚਾਰਾਂ ਨੂੰ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ ।